KUCHING, 27 June: Sarawak Microelectronics Design (SMD) udah bejadika Palan Turai Tukuh Chip enggau Akademi SMD keterubah di Borneo.
Ku Tuai Pegawai Eksekutif (CEO) SMD, Shariman Jamil madah enggau inisiatif pemadu baru nya, raban iya nyaran deka nerenak budaya penyulut inovasi di Palan Turai Tukuh Chip SMD.
Ku Shariman Jamil madah, palan nya deka muka peluang ngagai bakat baru Sarawak ngambika ba luan dalam industri tu.
“Nya alai, semua tu sebagi ari misyen ti beguna bendar ngagai SMD dikena ngemansangka teknologi semikonduktor.
“Pengawa tu senutuk enggau pengerembai pemadu baru raban kami, enggau nyendiaka sida endur kereja moden baka palan turai tukuh chip enggau sumber SMD ngambika kitai ulih nyaran enggau nerenak budaya penyulut inovasyen ba Palan Turai Tukuh Chip SMD,” ku iya.
Iya madah munyi nya rambau bejaku ba pengawa bejadika Palan Turai Tukuh Chip SMD enggau Akademi SMD di HSL Tower, kemari.
Ku terang iya, Palan Turai Tukuh Chip SMD enggau Akademi SMD nya ulih nangkup nyentuk ke 60 iku injinir turai tukuh enggau diwan mayuh guna sereta teater ungkup seminar, woksyep enggau achara.
Pia mega ku iya, injinir ari palan tu tu ila deka disikap enggau penemu ti diguna ungkup nengkebang enggau bekerejasama enggau kaban antarabansa sida di jerman enggau belgium.
“Kitai keterubah iya bekereja enggau kaban kunsi baka Melexis enggau X-Fab dikena nusun enggau ngerembaika konten industri.
“Udah nya kitai deka nyikap sida enggau kereban industri ungkup sida ke ngembuan pengelandik sereta penemu.
“Nya kebuah kitai deka terus nengkebang kerejasama enggau kaban antarabansa ke bukai enggau ngemesaika kerejasama enggau institusyen latih lokal enggau universiti baka CENTEXS, i-CATS, Sarawak Skills, Universiti Swinburne enggau ke bukai,” ku iya.
Nangkan ke nya, Shariman madahka SMD deka ngasilka 500 profesional semikonduktor manggai taun 2030.
Dikena nyapai saran nya, ku iya madah SMD nyendiaka insentif matak bakat-bakat nyengkaum pakej pampas ke kompetitif.
“Kami deka nentuka kami nguna pengering ke bisi di Sarawak.
“Aspirasyen kami endang terang ke alai kami deka ngasilka chip ti diturai tukuh enggau dipansutka di Sarawak, nya meh chap ke deka dipedajaka kami.
“Ukai semina nya aja, kami mega madahka chip-chip tu diturai tukuh enggau dikemansangka orang Sarawak,” ku iya.-TVS
