KUCHING, 27 June: Sarawak ulih nyadi pengeluar chip semikonduktor keterubah di Borneo seraya bisi daya ngasilka lebih mayuh raban pengejea pengawa dalam bidang nya.
Premier Sarawak Datuk Patinggi Tan Sri Abang Johari Tun Openg madahka, juluk tu ulih dijapai enggau pengawa ngelancharka palan turai tukuh chip keterubah ba Pulau Borneo ti dikemansangka sebengkah kompeni iya nya SMD Semikonduktor Sdn Bhd.
“Sehari tu nyadi jam ti besejarah ari sukut ekonomi Sarawak.
“SMD ditumbuhka kenyau dua taun ke udah dalam teknologi tinggi, kuasa gadung.
“Kitai begunaka tu dikena ngasilka kereban teknologi tinggi.
“Kesatu iya nya deka ngasilka turai tukuh chip, SMD udah ditumbuhka dua taun ke udah ke alai tanggungpengawa iya ngasilka orang ti ngaga turai tukuh chip ngaul rayat Sarawak.
“Turai tukuh tu diulih ari MELEXIS, dikena ngasilka ‘wafer’ ari XFAB.
“Baka ke ditemu kita, ‘wafer’ tu komponen ke pemadu beguna dikena nyimpan data dalam chip turai tukuh lalu diatu kitai ngembuan serikat ke ulih ngaga turai tukuh chip ungkup inovasi,”ku iya.
Iya bejaku munyi nya rambau bejaku ba pengawa bejadika Palan Turai Tukuh Chip SMD enggau Akademi SMD di HSL Tower, kemari.
Ku terang Abang Johari, nengah kerejasama SMD enggau serikat global baka di United Kingdom bedau lama ke udah, pengelebih tu ulih muka peluang ngagai perayat lokal.
”SMD tu ngembuan kohort sereta kerejasama enggau serikat UK ari sukur ngajar injinir ke deka nyadi pekereja tauka injinir.
“Kitai ukai semina ngembuan FDI tang mega komponen penyereta dalam industri semikonduktor ungkup tama ngagai Sarawak lalu kami ngembuan kuasa dikena nyendiaka kuasa dalam bidang dagang ngaga chip tu,”ku iya.
SMD ke beoperasyen di Tegas Digital Village berengkah enggau semina tiga iku injinir aja.
Diatu, SMD udah nambahka staf iya ngagai 30 iku injinir enggau perambu dikena ngasilka penyampau 50 iku injinir manggai ujung taun tu.-TVS
