PUTRAJAYA, 27 June: Penerang penuh senentang atur nikika gaji pengereja pengawa perintah deka dipadahka sebedau pejurai Bajet 2025 ti dibantai bulan Oktober tu ila.
Menteri Besai (PM) Datuk Seri Anwar Ibrahim madahka, atur ti dipejalai ba baruh Sistem Pinchin Servis Perintah (SSPA) nyadi pampas ngagai sida ti udah bebendar gawa pengudah bebelas taun gaji enda ditikika.
“Kitai meda baka udah lama atur nikika gaji enda dipejalaika.
“Reti nya, gaji pengereja pengawa perintah dalam gaya kitai ngansak sida lebih kuat diatu (sida patut) ransing agi gawa.
“Pengawa matau enggau terit atur nyengkaum SPRM ke lebih terit, datai ngenyit ngagai kandang endur sereta opis.
“Nyadi enti semua pekara nya enggau kitai ngarapka sida ransing gawa, udah bebelas taun nadai pansik sereta atur nikika gaji ti enda bechiping.
“Nya alai, aku (Hari Satu) di Parlimen, lebuh ditanya, aku nyemetak madahka aku enda bebatak asur laban tanggungpengawa kitai ungkup meri nama ke ulih sereta patut ngagai raban pengereja pengawa perintah.
“Enti nadai penanggul, aku deka madahka pekara nya sebedau bajet taun tu,” ku iya.
Anwar sebedau tu madahka atur nikika gaji pengereja pengawa perintah renggat baruh deka manggai 20 nyentuk 40 peratus nitihka atur ke udah ditetapka.
Taja pan sebedau tu dipadahka semina ngaul taga peniki gaji lebih 13 peratus, ku iya.
Tandu iya, sistem pansik SSPA lebih nemban, ke alai raban pengereja pengawa perintah ti mangku pengawa besai deka niki mimit aja, lalu sida ti bepangkat baruh deka ngasaika peniki gaji ti lebih mayuh.
Rambau Pengerami Hari Pengereja Pengawa 2024 tu tadi, Anwar madahka berita manah ngagai 1.6 juta iku pengereja pengawa perintah iya nya gaji raban nya deka ditikika lebih 13 peratus berengkah 1 Disember taun tu.-TVS
