KANOWIT, 25 June: Projek Bekal Ai Kanowit Fasa 2 ditu ti beungkus RM78 juta diatu benung digaga enggau disadang tembu bulan Disember tu.
Projek nya mega deka meri pengelantang ngagai peranak di sitak Durin, Kanowit sereta kandang endur ke besemak.
Menteri Utiliti Enggau Telekomunikasyen, Dato Sri Julaihi Narawi madahka, projek ti dipejalaika Opis Bekal Ai Menua Pesisir (JBALB) nya mega deka meri pengelantang ngagai sida di Sibu Jaya, Nibong Tada enggau Machan.
“Tu iya nya pelin timpuh panjai kitai.
“Enti bisi orang madah dia nadai (pelin) timpuh panjai, tu mih siti ari pelin timpuh panjai dikena mutarka penanggul ai di sitak Sibu nyengkaum Sibu Jaya.
“Tu chukup beguna ngagai sida ti enda kala ngagai taba, kitai bela ulih meda nama ke ulih digaga Kaunsil Ai Sibu enggau JBALB,”ku iya.
Iya mansutka jaku nya rambau aum media pengudah bejadika Pengerami Nasih Tanah Projek Ngangkatmanah Loji Ai Beresi Salim ba Kaunsil Ai Sibu (LAS), kemari.
Nangkan ke nya Julaihi mega madahka, projek ti berengkah bulan Ogos 2019 nya diatu udah manggai 85.2 peratus tembu.
Skop projek nya ngaul pengawa ngaga Stesyen Pengepam Durin enggau kapasiti 1.5 juta liter sehari (MLD) , tangki ai beringkat 3.5MLD di Bukong Jagoi enggau pengawa masang paip agih sepanjai 55 km ari Loji Ai Beresi Salim di Sibu ke Kanowit.
Pengawa ngaga paip nya diatu nyau deka tembu enggau semina agi tinggal tujuh peratus ari progres timpuh asal.-TVS
