SERIAN, 25 June: Operasi nyidi sereta mantu (SAR) siku orang tuai ke lenyau maya ngiga engkayu babas ba kampung semak Kampung Taee, Jalan Baki-Riih ditu, diketu pengudah nadai tetemuka sebarang bekau tudah.
Komander Operasi Balai Bomba enggau Penyah Penusah (BBP) Serian, PBK II Christopher Tungoh madah, SAR masuk hari letujuh udah berengkah pagi tadi tang nyentuk ke lemai pengawa nya agi puntan.
“Tim nyidi dibagi ngagai empat raban lalu pengawa nyidi lebih numpu semak motosikal tudah ditemu enggau ba kebun sawit sereta kebun getah, kelimpah sepanjai jalai nuju ke Kampung Taee.
“Pengawa nyidi disambung pengudah ngalihari tadi ka kandang kebun sawit nyentuk ngagai jalai endur motosikal tudah ke dipeda ditinggal tang agi puntan tetemuka bekau baru,” ku iya nengah sebengkah penerang sehari tu.
Ku iya, operasyen SAR diketu pukul 5 lemai tadi pengudah bekau orang tuai nya puntan ditemu.
Tudah ke lenyau, Asui Langgang, 88 nurun ari rumah kena 17 June tu tadi urung pukul 9 pagi ngena sebuah motosikal laban deka ngiga engkayu babas tang lalu nadai pulai ke rumah.
Pengawa terubah ngiga dipejalaika sida sebilik begulai enggau sida semenua tang semina tetemuka motosikal ke dikena tudah aja. -TVS
