BETONG, 25 June: Saspek besai kes beduan siku nembiak di Spaoh diriman empat hari berengkah ari kemari.
Tuai Polis Pelilih Betong Deputi Suprintendan Polis (DSP) Zamry Alli madah, beduduk ari pengawa nangkap enggau ngeriman saspek ngujungka kes nya dianggap teputar penuh.
“Tudah ke dikeduan bisi datai ngelawa Indu Opis Pelilih Betong ngaga ripot polis bekaul enggau isu (video) viral.
“Dalam video nya tudah dikeduan bala bakih iya empu.
”Bepelasarka penerang polis terus nyidi bala bakih tudah lalu semilan ari saspek udah ditangkap lalu beduduk ari sida kategori juvana ngujungka sida dilepas baru nengah ikat jamin.
“Saspek besai kes iya nya siku ke malu tudah udah diriman empat hari berengkah kemari,” ku iya.
Iya madah munyi nya maya dirandau TVS ba Balai Polis Betong ditu, sehari tu tadi.
Ku iya, pemujur nya siti ari japai ke chukup manah dipejalaika raban sida naka tu.
Tandu iya, keretas pansik kes enti udah tembu ila deka dianjung ngagai Sapit Pendawa Raya ungkup gerah nangkan ke nya laban sida ke bekaul enggau kes bela dibaruh umur tauka juvana.
Iya madah, raban polis sigi enda belembut enggau sebarang kes ke ngelanggar undang-undang lebih agi bekaul enggau kes beduan di Betong.
Atur ngeriman saspek dipejalaika ba mua Majistret Denny Lim lalu kes dipansik nitihka Seksyen 323/506 Kanun Keseksaan ke ngundan ukum jil nyentuk setaun tauka tunggu penyampau nyentuk RM2,000 tauka kededua sekali.-TVS
