KUALA LUMPUR, 24 June: Premier Sarawak Datuk Patinggi Tan Sri Abang Johari Tun Open kemari bisi baum enggau Kaban Parlimen Gabungan Parti Sarawak (GPS) ba Kuala Lumpur.
Dalam siti penerang nengah laman Facebook Sarawakku, aum begulai enggau Chairman GPS nya betuju deka bekunsika penerang pasal pekara ti ngaul polisi Perintah GPS sebedau berengkah hari keterubah Aum Kedua, Penggal Ketiga Parlimen Ke-15 sehari tu tadi.
“Aum pengelama tiga jam setengah nya betuju bekunsika penerang pasal sekeda pekara ke ngaul polis-polisi Perintah GPS enggau hak-hak Sarawak ke nyangka deka dibantai enggau dipetalatka di Parlimen,” ku penerang nya.
Nengah penerang nya, aum enggau Kaban Parlimen GPS nya berundingka polisi Perintah GPS enggau hak Sarawak ti dijangka dibai ngambika dipejurai ba parlimen.
Berebak enggau nya, Menteri Pemansang Indu, Ruang Bilik enggau Komuniti, Datuk Seri Nancy Shukri nengah laman Facebook iya mega madahka, aum Abang Johari enggau Kaban Parlimen GPS nya sebagi ari atur ke digaga baka selama parti nya sebedau berengkah Aum Parlimen.
Nancy ke mega Kaban Parlimen Santubong madahka, GPS deka terus negika hak nengeri tu senutuk enggau slogan ‘Sarawak First’.
Sama bisi datai, Luyar Besai Sarawak, Datu Saferi Ali enggau Sapit Sekretari Perintah Sarawak Datu Dr Muhammad Abdullah Zaidel.
Aum Kedua, Penggal Ketiga Parlimen Ke-15 deka diatur pengelama 15 hari berengkah sehari tu (24 June) nyentuk 18 Julai.-TVS
