KUCHING, 24 June: Opis Kereja Raya (JKR) Sarawak deka bejalaika pansik silik dikena ngelala kebuah penyadi penusah bah nyadi ba Kilometer 23, Jalai Betong -Sri Aman, Jalai Besai Pan Borneo.
Menteri Kereja Raya, Datuk Alexander Nanta Linggi madahka, kelimpah ari nya sekeda atur bukai deka dipejalaika nyengkaum ngeninggika paras jalai ba kandang endur ke bekaul.
“Aku udah dipadahka pegawai enggau konsultan sida maya jalai nya digaga, tempa tukuh iya endang manah, diambi kira dalam beberapa taun.
“Penusah ampuh bah nya enda disadang nyadi, tang laban penusah nya nyadi, udah tentu bisi kebuah.
“Siti ari kebuah nya, engka maya nya ujan bangat dalam timpuh pandak, lalu kebuah bukai diatu agi dipansik.
“JKR Sarawak pan agi meratika penanggul ba endur nya,”ku terang iya.
Iya mansutka pekara nya ngagai pemberita rambau Pengerami Ngelaluka Pengabang Hari Gawai ti diatur iya ba rumah iya empu, ditu, kemari.
Kena bulan nyin kemari, mensia mayuh bisi napi pemar nengah Jalai Pan Borneo beduduk ari penyadi jalai ampuh bah ketegal segang ai Sungai Skrang.
Lebuh nerang pasal arung jalai ‘Redline’, Nanta madah jalai ‘Redline’ nya ba Jalai Batu 8, Kuching entara jalai ti patut diberi perati berat bekaul isu penyekut trafik.
“Nyadi, maya kami bejuraika perambu, perambu nya udah dikemendarka Premier lalu iya ngerahai kami patut ngemeratka penanggul ba Batu 8.
“Kitai mega bisi bejimat bejuta agih belanja, nyadi kitai nguna laluh nya ungkup ngaga ‘Redline’ ba endur bukai tang mengkang mekuh ngambika bisi ‘Interchange’.
“Jalai pemintas ba jalai keliling Batu 8 dikena mutarka penanggul trafik ba endur nya,”ku iya.
Pengerami Ngelaluka Pengabang nya digulu Premier Sarawak, Datuk Patinggi Tan Sri Abang Johari Tun Openg enggau bini iya, Puan Sri Datuk Amar Juma’Ani Tun Tuanku Bujang, Sapit Premier Sarawak, Datuk Amar Douglas Uggah Embas enggau Sapit Menteri Ba Opis Premier (Undang-Undang, MA63, enggau Kaul Sarawak – Perintah Besai), Datuk Sharifah Hasidah Sayeed Aman Ghazali.-TVS
