BETONG, 24 June: Tuai Polis Pelilih (KPD) Betong Deputi Superintendan Polis (DSP) Zamry Alli ngenuku ke siti keretas pansik deka dibuka bekaul video kes beduan ngaul siku nembiak ti nyadi di pelilih Spaoh.
Ku iya, kes nya deka ditasat ba baruh Seksyen 323/506 Kanun Keseksaan enggau Seksyen 233 Akta Komunikasyen enggau Multimedia 1998.
“Raban polis amat udah nerima siti ripot ti digaga nembiak nya lalu kami udah ngasuh nembiak nya ngelawa sepital ngambika diperubat.
“Kes tu ditasat ba baruh Seksyen 323/506 Kanun Keseksaan enggau mega ba baruh Seksyen 233 Akta Komunikasyen enggau Multimedia 1998.
“Naka diatu, nembiak nya agi trauma lalu benung diperubat ba sepital.
“Kami naka ulih ngiga sida ti ngereja penyalah nya udah tu,” ku iya.
Iya bejaku munyi nya rambau ditelefon TVS bekaul kes beduan siku nembiak lalu video nya bisi dikerembai ba laman media rama.
Tandu iya, raban Polis Pelilih Betong mega deka ngiga sida ti bisi kaul dalam kes nya ngambika ulih dipansik silik.-TVS
