MIRI, 23 June: Raban rebak baru diperansang masuk Gerempung Ukai Perintah (NGO) ti bepelasarka budaya baka Gerempung Dayak Miri (DAM) ke ulih meri pemaik ngagai sida.
Tuai Komuniti Iban Pelilih Miri, Pemancha Alexander Isut Karin madah, gerempung tu ulih nyadi pelasar dikena sida belatihka budaya kelimpah ngerempaika main asai nya ngagai bansa bukai.
“Gawa dalam NGO baka DAM chukup badas laban ulih meri pemaik.
“Tu mih pelasar endur belatih ke pemadu manah lebih agi ngagai rebak biak.
“Chukup mayuh pelasar endur kita gawa enggau belajar, sekalika ba Unit Nembiak, Unit Indu, Pelajar, Dagang, Main Asal, Kaul enggau ke bukai.
“Kitai meda DAM pan bisi tim gendang pampat, Musang Labang, dipeda ngembuan peminta tinggi diatu.
“Sida suah dikangau merindang ba mayuh pengerami nyengkaum ari luar Miri,”ku iya.
Iya madah munyi nya ngarika Sapit Premier Sarawak, Datuk Amar Douglas Uggah Embas maya Pengerami Makai Lemai Ngiling Tikai 2024 DAM di Eastwood Valley, Hari Enam.
Nyerumba pengerami bela bisi diatur pengawa nyiri EXCO baru DAM 2024-2025, sereta nyuaka insentif pelajar ngagai nembiak ke dipilih.
Lebih ari 20 iku nembiak nerima insentif pelajar bekau ari penyulut sida ba bidang akademik baka Sijil Pelajaran Malaysia (SPM), Sijil Tinggi Persekolahan Malaysia (STPM) enggau renggat pelajar tinggi.
Alexander ke mega Penyanding Penemu DAM ngelalu raban komiti ke baru dichiri bejalaika pangku pengawa enggau manah seraya besaup negika perambu numbuhka Palan Main Asal Dayak dudi hari.
Ba pengerami nya DAM bisi nerima agih belanja sepenyampau RM25,000 iya nya RM10,000 ari Sapit Premier Sarawak Datuk Amar Douglas Uggah Embas enggau Kaban Kunsil Nengeri (ADUN) Lambir, Datuk Dr Ripin Lamat, sereta RM5,000 ari Kaban Parlimen Hulu Rajang, Datuk Wilson Ugak Kumbong.-TVS
