SARATOK, 23 June: Penumbuh Komiti Parti Demokratik Progresif (PDP) Pampang Awik siti pengawa manah dikena ngemudah pengawa ngaduka rintai kaban parti nya di Krian.
Chairman PDP Krian Friday Belik madah, atur nya mega beguna dikena nentuka rikod tauka data penyampau kaban PDP ba sitak nya seruran betul.
“Kitai mupuk-mupuk ngiga kaban baru laban enti nitihka rikod ari Indu Opis PDP di Kuching ba rintai mayuh iya nya manggai 4300.
“Nya penyampau ke bisi dalam rikod tang kitai enda nemu agika enda sida nya enggau kitai ba PDP?
“Enti nyema iya agi bisi ditu (manah) tang enti nyema iya udah betukar ngagai parti, kitai enda nemu,” ku iya.
Iya ke mega Kaban Kunsil Nengeri (ADUN) Krian madah munyi nya maya Pengawa Bejadika Penumbuh Komiti PDP Pampang Awik di Rumah Panjai Ram Juta di Blaong Awik, Saratok, empai lama.
Berebak enggau nya, siku veteran PDP Krian Blanda Katun 90 taun madah pengawa nambahka kaban baru dalam PDP Krian endang pengawa ke mesti dipejalaika raban tuai parti nya.
Ku iya, pekara nya beduduk ari sitak DUN Krian endang penuduk asal parti nya kenyau agi dikumbai Parti Demokratik Profresif Sarawak (SPDP) suba.
Blanda Katun mega madah diri deka terus talukka parti nyengkaum sida sebilik.
“Aku agi ngundi laban chukup manah nya aku enggai limpang ari parti tu mati idup enggau parti tu mih aku.
“Ngambika orang nyamai nemu baka nya aku enda nadai limpang ke bukai lebih agi kami sebilik.
“Aku tu endang iya tetap ngundi parti kitai tu, nadai limpang ke bukai,” ku iya.
Ku terang iya ke nyadi kaban PDP kenyau ari taun 1964, dalam ati iya dedin iya deka meda PDP Krian terus nyulut baka suba.-TVS
