MIRI, 23 June: Bisi 16 program besai deka diatur ejensi-ejensi dibaruh Opis Menteri Penyerakup Menua nyerumba Hari Kebangsaan enggau Hari Malaysia ke deka diintu kena bulan Ogos enggau September tu.
Menteri Penyerakup Menua Dato Sri Aaron Ago Dagang madah, bemacham aktiviti tu betuju meri peluang ngagai rayat sama ngambi bagi seraya berandau enggau pangan diri dikena negapka penyerakup.
“Kitai udah diberi pangku pengawa nyadi perintis ngerami Hari Kebangsaan enggau Hari Malaysia bulan Ogos tu.
“Mayuh program deka diatur (Opis Menteri Penyerakup Menua).
“Bisi 16 program besai maya Hari Kebangsaan enggau Hari Malaysia ti deka diatur kitai kena bulan Ogos enggau September.
“Sekeda aktiviti ke chukup dikerindu iya nya Konvoi Penyerakup, Nyidi Pengelantang, Pengawa Ngingatka Negarawan -Tunku Abdul Rahman enggau ke bukai,” ku iya.
Iya madah munyi nya ba aum media pengudah bejadika Karnival Penyerakup Miri nyerumba Pengerami Minggu Penyerakup (SMP) 2024 di Bakam Point, Hari Enam.
Kelimpah ari nya, Program Bemalam ba Muzium dijaga Opis Muzium Malaysia (JMM) ke nerima peminta tinggi lebih agi ari raban ruang bilik deka diatur pengelama seminggu dibanding semina beberapa hari taun ke udah.
Program bukai ti deka diatur iya nya Konvensyen Sekretariat Rukun Negara, Malaysiaku Merdeka, Randau Merdeka Renggat Nasional, Kembara Merdeka Anak Malaysia, Karnival Macha Perdana enggau Aum Besai Antarabansa Manuskrip Melayu.
Iya ngarap kaul kerejasama ke diatur dikena ngemujurka SMP 2024 ulih dibantai nengah Hari Kebangsaan enggau Hari Malaysia seraya ngangkatka agenda penyerakup menua.-TVS
