SARATOK, 22 June: Semua kaban Parti Demokratik Progresif (PDP) ba renggat baruh patut chakah matak mayuh agi penyereta kaban baru masuk nyemilik nyadi kaban parti nya.
Chairman PDP Krian Friday Belik madahka, nya beguna amat nyadi siti ari penyikap dikena napi Pengawa Bepilih Besai Nengeri (PRN) ti deka datai kelimpah ari negapka baru parti nya nyadi parti ti dikeandal komuniti.
“Orang ke nyadi tuai munyi ku jaku semampai betukar bisi datai enggau ngejang.
“Nya alai, aku ngarapka parti kitai mesti deka tegap.
“Beduduk ari nya, kitai begunaka mayuh kaban ba genap pampang awakka ulih nyadi injin (pemantu) parti maya napi pengawa bepilih deka datai,” ku iya.
Iya ke mega Kaban Kunsil Nengeri (ADUN) Krian madah munyi nya rambau Pengerami Numbuhka Komiti PDP Pampang Awik di Rumah Panjai Ram Juta Jingan, Blaong Awik Saratok, kemari.
Ku iya, ungkup tuju nya, raban pengawa bepilih PDP Krian ba semua renggat mega patut bebendar agi ngenyemakka diri enggau mensia mayuh ba semua palan ngundi (PDM).
Ku iya,sitak DUN Krian bisi 10 buah PDM iya nya PDM Mudong, Brayang, Batu Anam, Disso, Awik, Melupa, Kabo, Nanga Grenjang, Bajau enggau Krangan.-TVS
