SARATOK, 22 June: Bisi 125 Projek Transformasyen Menua Pesisir (RTP) ba Kunsil Nengeri (DUN) krian ti nguna kos penyampau RM17 juta udah dikemendarka kenyau ari taun 2021.
Kaban Kunsil Nengeri (ADUN) Krian, Friday Belik madahka, taja pia takah nya agi jauh enggau penyampau semua 260 buah rumah panjai ke bisi ba sitak Krian.
“Naka tu dua taun setengah semua RTP Projek ke udah dikemendar ba N. 39 Krian.
“Bisi 125 iti enggau ungkus belanja RM17.5 juta.
“Nya alai, semua rumah panjai kitai di Krian ditu bisi 259 buah rumah panjai apin setengah.
“Nyadi, aku ngarapka taun 2025 enggau 2026 ila ulih ngampitka semua 260 buah rumah panjai tu enggau RTP,”ku iya.
Iya mansutka jaku nya rambau Pengerami Ngiling Bidai ba Sekula Primari (SK) Wong Besi, ditu empai lama ke udah.
Ku iya madah, peminta dikena ngulihka projek nya tebuka sepanjai maya lalu patut dipadahka ngagai pusat servis ADUN Krian ungkup pekara ke patut tauka dipasukka ba lis projek bank.
Semua rumah panjai ke bedau nerima projek RTP mega dikearapka besabar nganti gintir diri empu.-TVS
