LIMBANG, 17 June: Udah datai maya iya Perintah Besai mulaika hak Sarawak bekaul enggau kuasa autonomi pelajar enggau pengerai.
Sapit Menteri Pengerai Mensia Mayuh, Pengawa Berumah enggau Perintah Lokal Sarawak Datuk Dr Penguang Manggil madah, atur nya chukup beguna ngambika Sarawak ulih ngatur perambu ke lebih berurun sereta manah bekaul enggau servis pengerai enggau pelajar senutuk enggau peminta rayat.
Ku iya, chukup mayuh klinik pengerai enggau sekula repuk ba Sarawak lebih agi ba menua pesisir patut dikemanah ungkup pengelantang rayat datai berubat sereta endur nembiak belajar.
“Nyadi nama utai ke digaga kitai diatu, Perintah Sarawak udah berandau enggau Perintah Besai mulaika baru autonomi Pelajar enggau mega pengerai ngagai nengeri Sarawak.
“Nama kebuah, laban enti kitai meda ari sukut pelajar ‘hardware’ enggau ‘sofware’ kitai napi mayuh penanggul lebih agi sekula repuk.
“Pia mega klinik-klinik ba menua pesisir udah balat repuk nadai dikemanah kelimpah perengkaguna nyau nadai menyana,” ku iya.
Iya madah munyi nya maya dirandau media nyerumba Pengerami Ngiling Bidai 2024 diatur Gerempung Iban Limbang ba Diwan St Edmund, kemari.
Lebuh nerang silik, ku iya Sarawak endang patut nentuka gaya pelajar nitihka peneka diri baka ke udah dipejalaika dibaruh iring Premier Sarawak Datuk Patinggi Tan Sri Abang Johari Tun Openg iya nya ngaga sekula peribit sereta ngambi sekeda universiti ke pemaik anak Sarawak dudi hari.
Ku iya berengkah taun 2026, anak Sarawak ke bulih masuk universiti dipenggi Sarawak deka ngasaika pelajar ke pechuma lalu tu siti ari atur pintar dipejalaika Perintah Sarawak.-TVS
