LIMBANG, 17 June: Projek Rumah Jelan Rega, jematan gantung dikena ngelawa sebuah sekula enggau sebuah klinik pengerai sereta nambahka kuota Tuai Raban Bansa Iban antara peminta ke dibantaika komuniti Iban ba sitak Medamit, Limbang.
Chairman Gerempung Iban Limbang Ali Adap madah, projek rumah jelan rega nya chukup beguna beduduk ari penyampau rayat ke majak nambah lebih agi ba sitak ujung Jalai Medamit.
“Ngarika Gerempung Iban Limbang enggau komuniti Iban ari sitak Medamit, nama utai ke dipinta nengah jaku aku tadi iya nya tiga pekara.
“Kesatu iya nya pasal rumah jelan rega, nya beguna amat digaga ba sitak Medamit laban rayat dedin udah mayuh.
“Nya alai ba sitak din Medamit chukup beguna amat ke rumah sebaka enggau sitak bukai,” ku iya.
Iya madah munyi nya maya Pengerami Ngiling Bidai 2024 diatur Gerempung Iban Limbang, ditu kemari.
Ali mega madah sebuah jematan gantung endang patut digaga perintah ngambika mensia mayuh senang deka ngelayang Sungai Nanga Medamit laban ba seberai sungai nya bisi Klinik Pengerai enggau sebuah sekula primari.
Ku iya, diatu mensia mayuh sereta nembiak sekula agi nguna perau deka ke seberai nyadi nya enda berapa likun enti nyema maya ai pasang tauka musin landas.
Bela bisi dipinta komuniti di menua pengawa nambahka kuota tuai raban bansa Iban lebih agi ungkup pangku pengawa Penghulu beduduk ari penyampau komuniti Iban ke majak nambah di sitak Limbang.-TVS
