LAWAS, 17 June: Opis Menteri Pelajar (KPM) patut meri perati enggau lengkas mutarka isu suntuk pengajar enggau staf pemantu sekula lebih agi ba dua sekula sekondari di Lawas ke agi nadai prinsipal.
Kaban Parlimen Lawas, Dato Henry Sum Agong madah, isu sama mega ditapi adminstrasyen ba Opis Pelajar Pelilih Lawas ke agi puang pengudah Pegawai Opis Pelajar Pelilih ke dulu suba pinchin.
“Sekeda endur begunan empai bisi au.
“Opis enggau ruang opis pan enda chukup lalu pia mega nadai staf, lebih agi bala pengajar pan enda chukup baka diatu dua SMK di Lawas nadai prinsipal.
“SMK di Trusan enggau mega di SMK di Sundar, bisi dua kelimpah ari nya…apin lama PPD kitai di Lawas udah pinchin lalu bedau bisi orang nganti.
“ Aku nesau raban bekaul beratika pekara tu putarka lengkas penanggul suntuk pengajar lebih agi ba menua Lawas tu.
Iya madah munyi nya maya dirandau pengudah Pengerami Graduasyen SPM 2023 Sekula Sekondari (SMK) Merapok di sebuah hotel tebilang ditu, kemari.
Henry Sum mega bisi minta Opis Menteri Pemansang Tumpuk Pendiau enggau Wilayah lengkas agi ngaga Maktab Rendah Sains MARA Lawas ke udah diberi pemendar kenyau empat taun ke udah.
Nya alai, ku projek nya udah dikemendar ba taun 2020 suba maya iya agi mangku pengawa nyadi Sapit Menteri Pemansang Menua Pesisir enggau Wilayah.
Tang pengawa ngaga projek nya ku iya agi nadai sebarang bekau nyentuk ke sehari tu.
Projek nya sebedau tu enti nitih udah digaga lalu ngambi awak tembu pengelama empat taun beungkus manggai RM140 juta.-TVS
