SERIAN, 16 June: Kontijen Sarawak nyaran bulih 14 midul emas bagi achara lumba gimnastik artistik ba Lumba Malaysia (SUKMA) Sarawak 2024.
Menteri Pelajar, Inovasyen enggau Pemansang Bakat Sarawak, Dato Sri Roland Sagah Wee Inn madahka, achara lumba nya deka diatur ba Serian Conference Centre (SCC) kena 12 nyentuk 24 Ogos tu ila.
“Ba lumba (SUKMA) serak tu , Serian Conference Centre, Bagi Menua Serian udah dipilih nyadi palan pekit ungkup main gimnastik artistik ti nyendiaka 14 midul.
“Kitai ngarap sida, Sarawak deka bulih semua midul emas ila. Nyadi orang Serian beri mih sukung ti penuh,” ku iya,’
Iya mansutka jaku nya rambau Program Pelanda Baton Lumba Malaysia (SUKMA) Sarawak 2024 enggau Para Lumba SUKMA Sarawak 2024.
Kaban Kunsil Nengeri Tarat nya mega madahka, palan lumba tu udah tembu dikemanah lalu diatu semina nganti penatai raban altit enggau pegawai datai kia.
“Nengah awak tu, aku ngansak semua rayat di Serian sama enggau ngerami lumba besai tu seraya meri sukung penuh ngagai semua atlit ti bepekit.
“Pandangka semangat dalam lumba sereta penyerakup ti tinggi nyadi rayat Sarawak ti negika semangat penyerakup ti tinggi,” ku tandu iya.
Semak 1,000 iku penyereta ngambi bagi dalam achara Pelanda Baton SUKMA Sarawak 2024 di Serian ti ngelingi mengeri Serian kira 4.05 kilometer penyauh.
Achara pelanda nya diuluka dua iku ikon lumba Sarawak iya nya Ex-Atlit Hoki Indu Menua Lisa Ludong enggau Jaguh Gumpal Isi Menua Buda Anchah.-TVS