ROBAN, 16 June: Sepenyampau RM70 juta udah diungkup ba baruh Ejensi Pemansang Bagi Menua Betong (BDDA) bagi sitak Kunsil Nengeri (DUN) Kalaka dikena ngemansnagka pengawa betanam betupi.
Kaban Kunsil Nengeri (ADUN) Kalaka, Mohamad Duri madahka, agih nya diberi dikena ngaga jalai baru enggau ngangkatmanah jalai ladang ungkup pengelantang raban pekebun sereta orang bumai ba sitak DUN Kalaka.
“Pia mega nengah projek BDDA aku ngungkupka lebih kurang 36 peratus tauka lebih kurang RM70 lebih juta.
“Nya deka dikena ngaga jalai kebun kitai di Saratok.
“Bagas bumai kitai di Saratok betanam betupi.
“Nya alai, kira 36 peratus (agih belanja) nya ungkup jalai kebun laban dikena ngemansangka tanah kitai lalu pengawa nya begunaka jalai,” ku iya.
Iya mansutka jaku nya rambau Pengerami Ngiling Tikai 2024 ke diatur gerempung Bansa Dayak Sarawak (SDNU) enggau Serakup Indu Dayak Sarawak (SIDS) Pampang Roban ditu, kemari.
Ungkup tuju ke sama, ku iya sepenyampau RM38.5 juta udah diberi dikena ngaga jalai kebun berengkah ari Taman Muhibbah nyentuk ke Rumah Panjai Senyawan.
Ngelansa pasal Pojek Ngangkatmanah Waterfront Krian, Mohd Duri madah, juru perunding bagi projek ti beungkus RM91.2 juta nya udah dichiri enggau deka ditinda dalam timpuh ke semak.-TVS