ROBAN, 16 June: Pemujur Gerempung Bansa Dayak Sarawak (SDNU) enggau Serakup Indu Dayak Sarawak (SIDS) Pampang Roban ngatur Pengerami Ngiling Tikai siti kelai ke chukup nyata mandangka penyerakup ke chukup tegap lebih agi ba pelilih Saratok.
Kaban Kunsil Nengeri (ADUN) Krian Friday Belik madah, pengerami ke nyadi kelai nutup pengerami besai komuniti Dayak nya digulu pupu bansa ke diau di Roban.
“Tu tadi nunjuk ke atur pengawa, gaya enggau kaul kitai enggau pangan diri endang iya chukup manah.
“Ukai semina kaul kitai enggau diri sebansa ukai semina kaul kitai enggau diri serumah diri semenua tang kaul kitai enggau raban bansa bukai baka Melayu, China baka ke malam tu ukai semina kitai Iban aja (berami) tang bisi mega kaban kitai ari bansa bukai,” ku iya.
Iya madah munyi nya maya Pengerami Ngiling Tikai 2024 diatur SDNU enggau SIDS Pampang Roban di Diwan Tebuka SJKC Chung Hua Roban, kemari.
Ku iya penyerakup ke udah tegap antara pupu bansa di sitak nya patut ditan nyentuk ke jemah ila ngambika mayuh agi pemansang ulih dikemujurka perintah.
Pengerami nya bela digulu bala tuai raban bansa ke besemak sereta dirichahka urung 500 iku pengabang.
Sama bisi datai Mandal Presiden PArti Progresif Demokratik Rakyat (PDP) ke mega ADUN Meluan Rolland Duat Jubin sereta ADUN Kalaka Mohd Duri.-TVS