MIRI, 16 June: Sapit Menteri Pengerai Datuk Lukanisman Awang Sauni madahka pasal begunan tambah Sepital Miri dijangka berengkah beoperasyen bulan Ogos tauka September taun tu.
Ku iya, pengawa ngaga begunan tambah sepital nya udah tembu kena 29 April tu tadi dikena nentuka penyampau katil enggau bilik emejensi chukup sereta lantang alai merubat bala pesakit.
“Aku deka madahka pasal begunan tambah Sepital Miri deka berengkah beoperasyen bulan Ogos tauka September taun tu.
“Tu mih begunan tambah ti udah lama diperambu tuai sebedau tu.
“Projek tu dilanggur kenyau ari Perambu Malaysia Lumpar Ke-10 (RMK)-10, digaga ba baruh RMK-11, lalu diatu ba renggat RMK-12.
“Diatu nyau semak 10 taun timpuh dikena ngaga begunan tambah dikena nambahka penyampau katil enggau bilik emerjensi ditangkir ngambika meri servis ke lebih manah,” ku iya.
Iya mansutka jaku nya rambau Kimpin Pemereti Penyakit Tibi ba Klinik Pengerai Jalan Merbau Miri, kemari.
Taja pan pia, enda madahka KKM diatu agi betapi enggau isu suntuk pengereja pengawa pengerau baka lutur pakar enggau misi ba sekeda sepital di serata Malaysia, ketebal agi Sarawak ke sigi endang wilayah pemadu besai ba menua tu.
Nya alai, iya meransang anak Sarawak enda ari ni penatai enti bisi juluk ati deka nyadi lutur enggau tebangkar ba bidang pengerai terus ransing gawa ngambika servis enggau pemandai sida ulih dikena nyaup komuniti menua tu dudi hari.
Tandu iya, bisi mega perambu deka ngangkat manah tikas Klinik Pengerai Jalai Merbau ke mega poliklinik pemadu tuai di Miri, tang suah agi dilawa mensia mayuh ke datai berubat kia.
Sebedau nya, iya bisi nyebut senentang perintah Sarawak begunaka agih penyampau RM17 billion dikena nentuka semua klinik repuk enggau klinik baru ulih digaga baru sereta diganti perintah besai.-TVS
