ROBAN, 16 June: Gerempung Ukai Perintah (NGO) baka Gerempung Bansa Dayak Sarawak (SDNU) enggau Serakup Indu Dayak Sarawak (SIDS) patut terus ngati kediri lalu enda ibuh malut diri enggau sebarang pengawa politik.
Kaban Kunsil Nengeri Nengeri (ADUN) Krian Friday Belik madah, laban ke nyadi gerempung ti ngarika komuniti Dayak sida patut lebih ngemeratka pengawa nyaup ngangkatka komuniti Dayak ba bidang ekonomi, rama enggau main asal nyengkaum bidang pelajar.
“Enti ulih kitai anang kelalu nyampurka pengawa ke baka tu (politik) dalam dalam SDNU.
“Anang nyampur iya enggau pengawa politik awak ke kitai ulih mujur.
“Enti kitai nyampur program politik ba NGO, kitai tusah deka mansang sereta nyingkang maju.
“Nya alai, aku arapka sida ke megai pengawa ba tiap-tiap gerempung (NGO) patut beratika pekara tu,” ku iya.
Iya madah munyi nya maya Pengerami Ngiling Bidai 2024 diatur Gerempung Bansa Dayak (SDNU) enggau Serakup Indu Dayak Sarawak (SIDS) Pampang Roban di Roban, Hari Enam.
Ku iya, laban ke nyadi pengari rayat iya deka naka ulih meri sukung ngagai sebarang program ke diatur kededua NGO nya di Saratok.
Ku terang iya, tu mega dikena nentuka penumbuh SDNU enggau SIDS di Roban mengkang nemban enggau meri pemaik ngagai rayat mayuh. -TVS