SARIKEI, 13 June: Urung 1,777 iku penyereta mujur ngambi bagi ba Program Bantu Lisin Deriba (BLM) MYLisin Renggat Kunsil Nengeri Krian enggau Kalaka 2024.
Sapit Direktor Opis Pengangkut Jalai (JPJ) Malaysia Sarawak Noraini Mohd Nawi madah, Pengawa Bejadi Nutup Program nya deka diatur kena 28 Julai tu ila sereta deka dikemujur Sapit Menteri Pengangkut Malaysia (MOT) Datuk Hasbi Habibollah.
“Ke penerang penyereta serak tu ngambi bagi ba Program Bantu MyLisin bisi 1,777 iku datai ari pelilih Saratok.
“Ungkup Pengawa Bejadi Nutup tu kami merambu deka ngangauka Sapit Menteri Pengangkut kitai tu deka bejadika pengawa nutup program kena 28 Julai 2024 ila,” ku iya.
Iya madah munyi nya pengudah betuaika Aum Ketiga Komiti Nutup Pengawa Bejadika Program Bantu Lisin Deriba (MLM) MYLisin Renggat DUN Krian enggau Kalaka ba Opis Residen Sarikei, kemari.
Ku iya, tuju besai pengawa ngatur Program Bantu MyLisin Deriba tu iya nya dikena mantu raban kurang pemisi bulih lisin deriba lebih agi raban pengempu motosikal Kelas B2 ke sah.
Berebak enggau nya, dikena nambahka tikas penyedar raban penguna jalai raya pasal pemesai guna ngemeratka pekara pengelikun ungkup diri empu engau orang bukai.
Sama bisi datai ADUN Krian Friday Belik ke mega Penyanding Penemu Program BLM Renggat DUN Krian enggau Kalaka 2024.-TVS
