KUCHING, 9 June: Sekeda pemutus asil ari Aum Komiti Kereja Nengeri enggau Perintah Besai bekaul sektor pelajar enggau pengerai deka dibai ngagai siti agi aum ti deka betuaika Menteri Besai, Datuk Seri Anwar Ibrahim.
Sapit Menteri Besai, Datuk Seri Fadillah Yusof madah aum nya betuju ngulihka pemendar ngaul dua sektor nya ari renggat Perintah Nengeri iya nya Sarawak enggau Sabah.
Ku iya, Premier Sarawak, Datuk Patinggi Tan Sri Abang Johari Tun Openg enggau Kepala Menteri Sabah, Datuk Seri Hajiji Noor bela deka ngulu aum nya.
“Bisi sekeda ripot ke dibantai asil ari Aum Komiti Kereja Renggat Sarawak enggau Sabah.
“Siti ngaul pelajar lalu siti agi ngaul pengerai enggau bisi sekeda pekara ke udah disetuju nyadi pekara tu deka dibai ke (Aum) Kaunsil ti deka betuaika YAB Menteri Besai.
“YAB Premier enggau YAB Kepala Menteri Sabah bela deka bisi enggau baum.
“Nyadi ni bagi pekara ke udah disetuju ba renggau Komiti Teknikal enggau Komiti Perintah Besai ungkup pemendar ari Perintah Nengeri mih ba renggat nya,’ ku iya.
Iya madah munyi nya maya dirandau media pengudah ngulu Pengerami Bot Naga di Surau Al-Nasar ditu, sehari tu tadi.
Tandu iya, sebaran pekara ke agi bedau disetuju deka dikerandau ngambika sida ulih ngatur baru lebih agi bekaul enggau bida ari sukut undang-undang ba rengggat perintah besai enggau mega peragam runding.
Asil ari aum nya ila deka diputuska sechara prinsip sebedau iya dibai ngagai renggat pemutus kabinet.-TVS
