BETONG, 9 June: Mensia mayuh lebih agi raban ke suah bejalai jauh ngena kerita dilalau seruran dulu meresa kerita diri empu sebedau ngepunka pejalai dikena nyeliahka penusah enda disadang baka angus kerita ke bisi nyadi dalam seminggu dua tu.
Pegawai Bomba Kanan 1, Balai Bomba enggau Penyah Penusah Malaysia (JBPM) Betong Abang Muhammad Fhazil Abang Abdul Manaf madah, antara komponen pemadu beguna ke mesti diperesa iya nya paras ai dalam radiator enggau paras minyak injin kerita.
“Tentuka enggau uji peresa dulu injin kerita kita baka ai dalam radiator, minyak injin, minyak M mesti diperesa dulu.
“Nyema nya bepenanggul tau bendar ngujungka pekara-pekara ke enda disadang.
“Kelimpah ari nya mega kita tau nganjung kerita diri ngagai bengkel ke semak ngambika diperesa sebedau ngepunka pejalai jauh,” ku iya.
Iya mansutka jaku lalau nya maya dirandau pemberita pengudah tembu operasyen ngesah kerita angus ba kandang menua Pentik Skrang ditu, sehari tu tadi.
Dulu ari nya, enam iku penumpang nyengkaum derita kesal pengudah kerita Toyota Avanza ke ditepan sida berasap lalu angus lengis ba tisi Jalai Besai Pan Borneo kandang menua Pentik, Skrang.
JBPM Betong betuaika Komander Operasyen, Pegawai Kanan Bomba (I) Muhammad Fhazil Abang Abdul Manaf berumban ngesah palan penusah nyadi pengudah nerima kangau tasah ari Palan Bilik Operasyen (PGO) pasal penusah nya.
Operasyen ke dipejalaika tujuh kaban bomba nya tembu pukul 10 pagi lalu udah nentuka palan nya likun sida mulaika diri baru ngagai balai.-TVS
