SIBURAN, 9 June: Karnival Gawai Dayak Bagi Menua Serian Renggat Nengeri Sarawak mujur nyapai tuju pengerami nya diatur bekau ari pemisi adat sereta budaya asal dipandang dikena ngelai Sarawak chukup nyelai sereta manah.
Menteri Pelajar, Inovasyen enggau Pemansang Bakat Sarawak, Dato Sri Roland Sagah Wee Inn madah karnival nya mujur nerenak pengawa asal seraya ngintu Gawai begulai enggau rebak biak sereta dikena narak runding rebak baru terus bebasaka adat asal nya.
Ku iya, kelimpah ari berami iya mega udah muka peluang ke chukup mayuh ungkup komuniti endur ngiga penerang ke chukup besai reti ngagai komuniti endur ngulihka penerang pelajar, penemu ngangkatka pengelandik enggau pengawa negapka komuniti.
“Misyen kami ungkup karnival tu chukup mudah tang besai reti dalam nerenak adat enggau pengerami Gawai ngagai rebak biak.
“Tu mega betuju dikena nentuka adat enggau budaya nya terus dibasa sereta dikemansang ungkup rebak dudi,” ku iya.
Roland ke mega Kaban Kunsil Nengeri (ADUN) Tarat madah munyi nya maya Pengerami Bejadi Nutup Karnival Gawai Dayak Bagi Menua Serian Renggata Nengeri Sarawak sereta Malam Final Pekit Dayung Sangon enggau Dari Pogan 2024 di Diwan Manggeng Kampung Masaan Siburan, malam tadi.
Nangkan ke nya, iya madah batang tuju sida ngatur pengerami nya laban deka meda pengerami nya meruan bisi sebaka enggau pengerami bukai di dunya tu.
“Aku berasai gagit deka madah kami udah nyapai tuju nengah pengerami tu lalu ari tu mega udah nyendiaka peluang ke chukup besai ungkup pelajar, pengawa ngangkatka pengelandik enggau negapka komuniti,” ku iya.
Ku tandu iya kerejasama enggau penyerakup ke dipandang sekumbang pengerami nya patut ditunda ba sebarag program ke deka diatur dudi hari.
Pengerami Karnival Gawai Dayak 2024 diatur tiga hari berengkah 6 June nyentuk 8 June tu tadi ba Kampung Masa’an Siburan lalu achara kepenudi iya nya Malam Final Pekit Dayung Sangon enggau Dari Pogan 2024.-TVS
