BETONG, 8 June: Kontinjen Sekula Sekondari (SMK) Saribas terus mandangka penyulut pengudah sekali agi ngempu gelar champion Pekit Bejalai Beraban nyerumba Gawai Dayak Bagi Menua Betong 2024.
Pemujur kontinjen ti betuaika Tama Jembat nya lebih ngemegah, pengudah dipadu nyadi champion ba Kategori C iya nya Kategori Khas Ungkup Sekula-Sekula Sekondari ti ngujungka sida mai pulai perais penuh sepenyampau RM15,000.
“Nya mih pekara ti ngemegah kitai laban kitai enda nyangka ulih menang tang kami endang bebendar deka ngetanka gelar champion tu nya mih juluk ati kami,” ku iya.
Berebak enggau nya, ba penemu pengajar Resa Bilie pemujur tim sida bulih lumur dua mega enda disadang laban nya keterubah iya diasuh nyadi tuai kontinjen.
“Iya…nadai utai ulih disebut bagi aku laban tu terubah iya enggau orang pengawa tu udah nya lalu dipaduka orang nyadi Tuai Gawai ungkup Sekula SMK Saint Augustine.
“Udah nya bulih lumur dua ba aku nadai utai lebih manah ari nya taja pan kitai ngandalka diri bulih lumur satu tang bulih lumur dua ba aku chukup nguji enggau manah mih naka tu,” ku iya.
Sida bela mansutka penemu nya maya dirandau pengudah pengawa nyuaka perais ngagai semua pemenang genap kategori diatur ba Diwan Panglima Rentap di Betong, Hari Enam.
Perais semua pemenang disuaka Sapit Menteri Nembiak, Lumba enggau Pemansang Dagang Sarawak Dato Gerald Rentap.
Bisi 43 buah semua kontinjen ngambi bagi ba Pekit Bejalai Beraban ke dibagi ngagai empat kategori.
Ungkup Kategori A, iya nya Kategori Opis Perintah enggau Opis Bekanun sereta Peribit ngemataka Kontinjen Opis Pengerai Bagi Menua (PKB) Betong bulih gelar champion ditangkan Opis Betanam Betupi Betong enggau Centexs ba penuduk lumur dua enggau tiga.
Ba Kategori B, Tuai Rumah Panjai, Genturung Pendiau, Gerempung Ukai Perintah enggau Pasar, gelar champion diempu kontinjen Gerempung Tuai Rumah (GTR) N.36 Layar ditangkan lumur dua kontinjen Dayak Bukit Kelingkang (DBK) enggau Gerempung Bukit Saban bulih lumur tiga.
Udah nya, ba Kategori C, ungkup Gerempung Apai Indai enggau Pengajar (PIBG) Sekula Sekondari ngemataka SMK Saribas nyadi champion ditangkan SMK Saint Augustine lumur dua enggau KoleJ Pom Enam Saratok bulih lumur tiga.
Nangkan ke nya ba Kategori D, iya nya PIGB Sekula Primari , SK Saint Augustine bulih gelar champion ditangkan lumur dua enggau tiga dipenggi SK Spaoh enggau SK Abang Abdul Kadir Betong.
Champion penuh pekit nta nerima perais mata duit sepenyampau RM10,000 sereta tropi.
Udah nya champion genap kategori bela nerima perais mata duit RM5,000, lumur dua nerima RM2,000 enggau lumur tiga nerima RM1,000 disempulang enggau trofi.-TVS
