ROBAN, 8 June: Penumbuh Gerempung Tuai Rumah dipeda nyadi pelantar pemadu manah ungkup tuai ba renggat baruh mantaika buah penemu enggau peminta sida ngagai perintah.
Kaban Kunsil Nengeri (ADUN) Krian Friday Belik madahka, genap penemu ti dibantaika nengah gerempung deka lebih didinga perintah dibanding ari penemu orang kediri.
”Kitai ti mansutka buah penemu nengah gerempung diraup semua penanggul nya tadi dikenatai nengah gerempung ngagai perintah tauka pengari rayat.
“Chara baka nya lebih nemban ari ti bejaku kediri ngarika rumah panjai laban enti bejaku nengah gerempung peminta kitai nya deka kering agi.
“Ambika banding dikena ngenataika sebana, penanggul tauka sebarang peminta ke meri pemaik ngagai mensia mayuh,” ku iya.
Friday mansutka jaku nya rambau pengawa bejadika penumbuh Gerempung Tuai Komuniti Enggau Tuai Raban Bansa (KMKK) Roban, kemari.
Ku iya nambah, nengah pemisi gerempung baka nya, deka ngemuntangka agi atur pengawa pengari rayat enggau perintah dalam nentuka enggau bejalaika aktiviti tauka projek pemansang ti lebih meruan sereta meri penguntung ngagai rayat mayuh.
KMKK Roban naka tu bisi 63 iku kaban ti ngaul bala tuai rumah ari sitak Krian, Kalaka enggau Kabong.-TVS