KUCHING, 8 June: Jaguh Muay Thai menua, Muhammad Johan Ghazali Zulfikar tauka lebih dikelala enggau nama kangau Jojo puntan ngempu gelar champion ba Pekit One Championship pengudah alah nyatup champion WMF Muay Thai lima kali ari Vietnam, Nguyen Tran Duy Nhat Ba Pekit One 167 di Impact Arena, Bangkok, Thailand.
Jaguh biak ari tim Rentap Muay Thai Gym nya alah nengah pemutus penuh raban pengadil ti udah milih Nguyen ke beumur 34 taun.
Alah ba pekit nya, kira keterubah iya Jojo alah sepengudah lima kali bejurut menang ba Pekit One Fight.
Empat ari rikod pemujur Jojo dijapai nengah teknik bukut ‘Knockout’.
Taja pan alah, Jojo mujur mandangka penyikar enggau pemerani diri lebuh belaban ba kelang pengelama tiga renggat ‘Flyweight’ nya.
Nangkan ke nya, Nguyen 34, mujur menang nengah pemutus penuh bala akim.
Nguyen ngarika Tim Hochiminh City Muay dipeda lebih kasar iya nya mayuh meri bukut ke udu enggau mayuh bulih nendang Jojo.
Ke penerang, ba Oktober taun nyin kemari, Jojo nempa sejarah pengudah nyadi atlit bebukut pemadu biak bulih kunterik berega AS$100,000 (RM463,300) enggau Pekit One Championship.-TVS
