BINTULU, 8 June: Ulah sekeda penguna suah nguji ngaga pusin U tauka ‘U-Turn’ ba pusin P (‘P-Turn’) endang ulah ke ulih ngundang penusah ngagai penguna jalai raya ke bukai.
Menteri Industri Pemakai, Komoditi enggau Pemansang Wilayah (M-FICORD), Dato Sri Dr Stephen Rundi Utom madah, mayuh penusah aksiden diripotka nyadi ketegal ulah enda mereti nya lebih agi maya musin pengerami.
Nya alai iya ngelalau raban bekaul patut ngatur siti program penyedar dikena nerangka bida jalai raya diri enggau jalai besai.
“Siti agi aku nangkan sapa ke mai kerita pengudah Gawai, mulaika diri ke Kuching ari dedini endur ba Sarawak tu mayuh amat penusah aksiden jalai raya.
“Nyadi tu jalai besai ukai jalai diri lalu tikas pengelaju kerita kekadang manggai 120 kilometer (per jam) enggau ke bukai.
“Mayuh P-Turn, P-Turn dia pusin bisi nya jauh dia iya (penguna jalai) nguji chara P-Turn enchuri nyadi orang bukai ti udah laju dini sempat nekan berik,” ku iya.
Dr Rundi ke mega Kaban Kunsil Nengeri (ADUN) Kemena madah munyi nya ngagai media pengudah ngabas Rumah Ugop Umpin di Sebauh, ditu kemari.
Nangkan ke nya, iya madah diri bisi ninga rita penusah ke nyadi ba Roban enggau ke bukai.
Nya alai, iya ngarap amat mensia mayuh mesti nitihka atur ke betul maya bekenaka kereban pengangkut ba Jalai Besai Pan Borneo dikena nyeliah penusah enda disadang.
“Sehari nya pan penanggul nyadi enti ulih raban JPJ tauka raban Opis Menteri Pengangkut ngaga siti rapat program ngambika ngelala bida jalai besai enggau jalai raya diri.
“Jalai nadai tusah, jalai bisi pan tusah,” ku iya.-TVS
