ROBAN, 7 June: Opis Bekal Ai Menua Pesisir (JBALB) Sarawak diansak patut lengkas agi bejalai projek bekal ai beresi ba enam kandang endur di Kalaka.
Kaban Kunsil Nengeri (ADUN) Kalaka Mohd Duri madahka, peminta ungkup pejalai projek tu ngaul udah dibantaika ngagai JBALB taun siti nyin suba.
“Bisi sekeda endur bedau bulih bekal ai beresi tauka ba baruh projek bekal ai beresi.
“Nya alai, aku udah minta ngagai raban bekal ai ngambika sida bejalaika projek ba Rumah Embul, Rumah Ali, Rumah Augustine di Empayak enggau sekeda endur di Jelupang.
“Arapka projek tu bulih pemendar ari raban KKDW awakka projek tu ulih dipejalaika enggau jampat,”ku iya.
Mohd Duri mansutka pekara nya rambau Pengerami Ngabang Gawai Dayak 2024 ADUN Kalaka Ngagai Rumah Panjai Embul Asom di Sungai Anak Empeliau Seblak Roban, kemari.
Udah nya, ku terang Mohd bekau ari pengelaun pejalai projek nya, udah meri empas ngagai pengidup ninting hari perayat dia lebih agi maya musin kemarau.
Entara enam endur di DUN Kalaka ke agi betapi enggau penanggul bekal ai beresi iya nya Kampung Paloh, Kampung Perpat, Lubok Nibong enggau Kampung Kaba.-TVS