SIBURAN, 7 June: Program Penegap Pelajar Sarawak (SEEP) betuju nyadi langgur timpuh panjai dikena ngemanahka agi pemutus peresa Sijil Pelajaran Malaysia (SPM) di Sarawak ngambika sebaka enggau pupu rata tikas nasional dalam timpuh lima taun.
Program nya disedika khas ungkup nembiak ari Pom Tiga nyentuk Pom Lima berengkah taun tu.
Menteri Pelajar, Inovasyen enggau Pemansang Bakat Sarawak Datuk Roland Sagah Wee Inn madah, program nya deka meri sekeda leman tuiseyn ke bebida iya nya lebih berat ngagai chara nyapai pemutus peresa ke lebih lati.
“Kami deka berengkah taun tu program SEEP tu iya nya dikena nentuka bisi siti program ke ditempa opis menteri kami begulai enggau raban pengajar ungkup nembiak.
“Sekeda leman tuisyen lalu tu baka ke ditemu kita ba pun taun nyin kemari, ujung taun nyin kemari lebuh Menteri Besai (Datuk Seri Anwar Ibrahim) madah, dia iya deka meri mayuh agih belanja ungkup tuju nya nyadika belanja kami (ngatur program) ungkup taun tu.
“Nya alai kami deka… program-program tuisyen. Leman tuisyen ke bebida iya nya deka lebih meri perati senentang baka ni deka nyapai pemutus ke lebih lati,” ku iya.
Iya mansutka jaku nya maya bejadika Eksibisyen Pelajar Nyerumba Karnival Gawai ditu pagi tadi.
Ku terang iya, Program SEEP nyaran ulih dipasuk mayuh agi nembiak Pom Empat enggau Lima milih kolej laban nya deka nyikap graduet nangkup peminta makit kereja jemah ila.
Pengawa nya endang seriris enggau Strategi Pemansang Pasca Covid-19 Sarawak 2030.-TVS
