KUCHING, 7 June: Pangku pengawa nyadi Sekretari Politik ukai pengawa ke muntang, tang nya siti basa ke chukup besai.
Sekretari Politik ngagai Premier Sarawak ke baru dipadu, Dato Nyomek Nyeap madah, pengawa nyadi Sekretari Politik diperati nyadi penyambung antara menteri enggau rayat ba sesebengkah sitak.
Nya alai, ku Nyomek, taja deka mangku pengawa ke berat, iya berasai beterima kasih laban udah dikearap raban ketuai renggat tinggi di Sarawak sereta mega Parti Rayat Sarawak (PRS).
“Pangku pengawa tu chukup berat laban aku diberi pengandal bala ketuai PRS ngatur sereta nyaga semua peminta enggau pengelantang bala kaban PRS ari komuniti Bidayuh.
“Bisi lapan sitak menua lalu tu mungkur sitak Tanjung Datu, Opar, Tasik Biru, Serembu, Mambong, Tarat, Kedup, Bukit Simuja enggau Tebedu.
“Nya alai, pangku pengawa tu chukup besai, laban kitai bisi pengari rayat PRS. Beduduk ari nya, sebarang pekara ke nyadi ba sitak Bidayuh, aku deka ngesan pangku pengawa tu,” ku iya.
Nyomek mansutka pekara nya maya Pengawa Angkat Sumpah Nyadi Sekretari Politik Ngagai Premier Sarawak dikemataka Sapit Premier Sarawak, Datuk Amar Douglas Uggah Embas ba Wisma Bapa, Kuching, sehari tu tadi.
Nyomek ari Parti Rakyat Sarawak (PRS) dipadu mangku pengawa nya nukar Charles Chad Nissom.
Iya diatu beumur 74 taun, siku Pegawai Polis ke udah pinchin lalu pangkat kepenudi dipangku iya dalam pengawa polis iya nya nyadi Sapit Kepala Polis (DCP).
Iya pinchin taun 2006 pengudah 36 taun gawa enggau raban Polis Diraja Malaysia.-TVS