KUCHING, 29 Mei: Perintah deka mantaika penyampau baru honorarium (elaun belatih) atlit lumba Para SUKMA 2024 bulan tu ketegal siruka pengelantang sida, ku Dato Sri Fatimah Abdullah.
Menteri Pemansang Indu, Anak Mit enggau Pengelantang Sarawak madah, penambah elaun atlit nya nitihka kategori sida awak ulih nyadika peransang sida napi Lumba Malaysia (SUKMA) Ke-21 taun tu.
Elaun nya ku iya deka ngujungka bala atlit bejalaika latih intensif nyadi penyikap napi SUKMA.
“Aku nyebut nya elaun jam laban sida belatih baka ke udah disebut aku tadi awakka sida ulih nurun belatih.
“Baka ke udah disebut aku sekeda sida nya nadai nurun gawa, bisi mega kereja berikan tang ketegal belatih sida begunaka elaun,” ku iya.
Fatimah madah munyi nya maya dirandau media pengudah ngabas pengawa belatih ke dipejalaika raban atlit para SUKMA Ke-21 Taun 2024 di Pegung Nyemerai, Kompleks Nembiak enggau Lumba ditu, kemari.
Penyampau elaun baru nya ngaul lima kategori iya nya Atlit Pelapis A (RM1,200), Atlit Pelapis B (RM1,000), Atlit Pelapis C (RM800), Atlet Baru (RM600) enggau Atlit Elite (RM1,500).
Udah nya, ungkup pemenang midul, insentif deka diberi lalu perintah udah ngagihka belanja ungkup tuju nya tang penyampau iya agi bedau diputuska.
Insentif ke sama mega deka diberi ngagai atlit paralimpik ke mujur nempa rikod baru maya SUKMA nya ila. -TVS
