BETONG, 27 Mei: Genap bansa di Malaysia ngembuan kuih tradisional kediri empu ti deka dinahka ngagai temuai ke datai ngabang maya musin pengerami.
Ba komuniti Dayak Iban, kuih tradisional baka penganan chuan, penganan iri (penyaram) enggau penganan tatuk tauka sarang semut entara kuih ti seruran bisi dinahka maya ngintu pengerami Gawai Dayak.
Ku Chairperson Serakup Indu Gensurai Layar (SIGL) Betong, Helen Sunta Wringkye, 59 taun, pemisi penganan ti dinahka maya hari Gawai, ukai semina kuih ti suah dibantaika aja laban penganan mandangka identiti, adat enggau budaya komuniti Iban ari kelia menya.
“Penganan tu laban dulu menya bala kitai sigi nadai mayuh bansa macham kuih nyadi kuih penganan tu baik penganan iri, penganan chuan tauka penyaram disebut orang utai tu endang enda tau enda (digaga) laban mandangka siti ari bansa kitai (Iban).
“Ari adat kitai endang mesti bisi Penganan tu.
“Nyadi pengawa kami ke ngaga chuan nya tadi dikena kami ngingatka siti ari kuih ke endang mesti bisi maya gawai ke endang ari turun menurun ari aki ini kami ngelama tu.
“Awak ke pengawa tu enda lenyau ngapa,” ku iya.
Iya bejaku munyi nya ngagai TVS pengudah tembu Aktiviti Ngaga Penganan Chuan diatur Serakup Indu Gensurai Layar Betong ba Rumah Panjai Edward Anding Gensurai, Hari Minggu tu tadi.
Ku iya mega, tuju aktiviti ti diatur serak tu iya nya dikena meri penyedar ngagai tetiap iku kaban sigl senentang pemesai guna nemu enggau lebih silik agi pasal kuih tradisional bansa Iban, iya nya penganan.
“Ngagai bala nembiak ke baru baka sehari tu pan bisi orang ke nembiak dibai kami sama-sama belajar baka sida rebak baru chukup bebasa, belajar enggau jauh timpaike mua pasal pengawa ngaga penganan.
“Pia mega awak ke sida iya nemu chara ngaga penganan tu belajar ari sida ke tuai-tuai,”ku tandu iya.-TVS
