KUCHING, 26 Mei: Menteri Besai Datuk Seri Anwar Ibrahim dipelaba deka mantaika sekeda berita manah ungkup pemekuh media ba selampur menua pagila.
Ngelansa pekara nya, ku Menteri Komunikasyen Fahmi Fadzil berita nya deka dibantai maya Pengerami Pengujung Hari Wartawan Nasional (HAWANA) 2024 ti deka dipenyadika Anwar ba Hotel Pullamn, ditu.
“Nyema bisi bala bakih pemberita ti ngasaika penanggul tang nadai insurans tauka PERKESO tauka nadai duit simpan.
“Nyadi taun tu, kitai deka nganti enda lama sampai ke Hari Satu ba jaku (Menteri Besai) ila kitai deka mantaika sekeda pekara.
“Aku, Premier enggau Yang Berhormat Menteri Besai bela bisi berita manah ungkup bala bakih ke bekaul enggau bidang media,” ku iya.
Iya madahka pekara nya maya Pengerami Bejadika Serakup Kelab Media Malaysia (GKMM) di Riverside Majestic Hotel, ditu kemari.
Ku terang Fahmi, patut bisi randau betemu mua antara opis menteri enggau gerempung media alai berandauka sekeda pekara nyengkaum isu sereta penanggul ke ditapi raban pemekuh media.
“Aku deka meri jami ngagai bala bakih (media) ditu aku ngasai diri sigi enda belembut nyema bisi bala bakih pemberita diamang tauka diemba sebarang raban.
“Aku deka enti ulih semua pemberita lebih agi sekalika dalam GKMM tauka sida ke bisi kad pengaku media seruran diintu enggau profesional.
“Tu ukai reti, kitai enda tau ngelara, tang bisi chara tauka lebas iya lalu aku pemadu enda ulih belembut iya nya kachau seksual orang selalu ngumbai kachau seksual tu ngagai indu aja, lelaki pan kekadang mega bisi kena kachau,” ku iya.
Ba pengerami nya, Fahmi bisi madahka pemeri belanja sepenyampau RM20,000 nyadi belanja pemungkal dikena Serakup Kelab Media Malaysia.-TVS
