SIBU, 26 Mei: Pengerami Gawai Dayak ke diintu kena 1 June ninting taun komuniti Dayak di Sarawak endang pantar ngempuruka komuniti pupu bansa enggau pengarap lalu sida dipeda ulih begulai lantang enggau pangan diri.
Menteri Kereja Raya, Datuk Seri Alexander Nanta Linggi madah, pengerami nya ukai semina diintu komuniti Dayak tang mega bela dirami begulai enggau semua bansa baka Pengerami Taun Baru China enggau Aidilfitri.
“Taja pan kitai (orang politik) nyangka bebida penemu lebih agi maya pengawa bepilih besai, tang maya Pengerami Gawai kitai begempuru lalu aku ngasai malam tu kitai nunjukka pengelantang di nengeri enggau menua kitai tu.
“Genap iku kitai ditu ukai semina ditatak ungkup bansa Dayak aja tang mega mungkur semua pengarap enggau suku bansa ke bukai,” ku iya.
Iya madah munyi nya maya Pengerami Malam Mantar Gawai Dayak Sibu 2024, malam tadi.
Pengerami nya diatur begulai Serakup Bansa Dayak Sarawak (SDNU) Sibu, Serakup Indau Dayak Sarawak (SIDS) Sibu, Gerempung Bansa Orang Ulu (OUNA) Sibu enggau Gerempung Bansa Dayak Bidayuh (DBNA) Sibu.
Nanta madah enda ngira nama aja pengarap ke dipegai semua bansa ngembuan pesan enggau tuju ke sama deka dijapai.-TVS
