SARATOK, 26 Mei: Sebuah diwan Palan Pesaka Asal Enggau Budaya beungkus RM15 juta deka digaga di Saratok enda lama agi.
Kaban Kunsil Nengeri Krian, Friday Belik madahka, taba endur ngaga projek nya udah dikelala enggau peminta mega udah dikenataika ngagai raban ke bekaul ungkup atur ke patut.
“Palan Pesaka Enggau Budaya Saratok tauka Krian beungkus RM15 juta deka digaga lalu diatu benung ngiga tanah.
“Taja projek nya udah dikelala lalu dianjung ngagai raban SPA, semina nganti pemendar.
“Nyadi enti udah tembu ila, diwan nya deka ulih muat urung 100 ngagai 120 iti mija, disikap enggau gelanggang, bilik aum sereta ngundan siti galeri alai mandangka gambar tukuh-tukuh ari Saratok ditu,” ku iya.
Ku iya, pengawa ngaga palan nya dipelaba deka dipejalaika dalam dua renggat bepanggai ba peminta guna projek nya.
Ngelansa pasal pekara bukai, iya madah, bisi RM20 juta udah diungkup dikena bejalaika Projek Ngangkatmanah Jalai Ladang ba baruh Ejensi Pemansang Bagi Menua Betong (BDDA) di Saratok.
“Projek ekonomi kitai udah ngungkupka RM16 juta dikena ngaga jalai kebun di Krian ditu.
“Sekeda nya udah belabuh lalu sekeda tadi dalam proses benung ngiga senarai sapa deka diberi bepelasarka peminta ke bisi diterima ari Opis Betanam Betupi enggau Palan Servis.
“Pia mega aku bisi ngungkupka agih belanja RM4 juta dikena ngaduka pengawa betanam betupi moden,” ku iya.
Iya mansutka jaku nya rambau Pengerami Makai Lemai Mantar Gawai Dayak diatur Gerempung Bansa Dayak Sarawak (SDNU) enggau Sarakup Indu Dayak Sarawak (SIDS) Pampang Saratok.
Berindik ari nya, iya madah, agih belanja penyampau RM300, 000 udah dikemendarka ungkup tuju ngangkatmanah Diwan Rumah Dayak di Saratok.
Nya alai, iya minta raban pengatur Rumah Dayak Saratok ngambika ngatur aum silik enggau raban Opis Kereja Raya (JKR) sereta Tuai Raban Bansa enggau Tuai Komuniti (KMKK) ke bekaul di Saratok dikena nentuka komponen ti deka diseruri nguna agih ke diberi nya.-TVS
