SARATOK, 25 Mei: Bisi enam buah rumah panjai dikemanah nengah Projek Ngemanah Rumah Miskin Sarawak (PPRMS) Taun 2024 Fasa Satu beungkus RM500, 000 di sitak Kunsil Nengeri (DUN) Krian.
ADUN Krian Friday Belik madah, naka tu semina dua buah rumah panjai ke bekaul udah tembu digaga lalu ke bukai nyau deka tembu kelimpah agi bisi nganti diserah ngagai pengempu rumah.
“Ungkup taun 2024, nyadi PPRMS Fasa Satu bisi enam buah rumah panjai ke dikemendar kitai nengah agih belanja RM500, 000.
“Nya alai aku ngarapka projek tu ulih mantu ngelempungka tating belanja pengani rumah panjai ari sukut belanja,” ku iya.
Iya madah munyi nya maya dirandau TVS pengudah pejalai enda lama ngagai siti Projek Ngemanah Rumah Miskin Sarawak (PPRMS) Fasa Satu Taun 2024 ba Rumah Panjai Selat Dunggaw ba Sungai Anak Peligong, Hari Lima.
Ku iya, ungkup fasa kedua projek nya deka berengkah bulan Tujuh tauka bulan Lapan tu ila.
Tandu iya, raban sida diatu benung ba proses beratika rintai peminta ke diterima ari rumah panjai di DUN Krian ke begunaka projek nya.
Antara rumah panjai ke benung dikemanah ba fasa satu iya nya Rumah Linggir Anyum di Batu Tiga Sebetan, Rumah Selat Dunggaw Sungai Anak Peligong, Rumah Balaki Sungai Engkabang, Rumah Jimbon Kup Ibus enggau Rumah Desmond Sungan di Kamidan Jaya.
Berebak enggau nya, ungkup PPRMS di Rumah Panjai Maling Babang deka diperati baru laban bisi penanggul.-TVS
