LAWAS, 24 Mei: Urung 56 iku nembiak ke bemalam ba buding Sekula Primari (SK) Siang-Siang Lawas selamat nengah bantu raban bomba pengudah kandang sekula nya ampuh bah, tumu pagi tadi.
Tuai Balai Bomba enggau Penyah Penusah (BBP) Lawas Azman Ibrahim madah, kelimpah ari nembiak, bela dipindah ari sekula nya 16 iku pengajar enggau enam agi staf pemantu sekula ngena sebuah bot.
Ku Azman, raban sida nerima kangau tasah urung pukul 7.45 pagi lalu berumban ngesah sekula nya ke bepalan urung 14 kilometer ari balai bomba.
“Bilik Operasyen Balai Bomba enggau Penyah Penusah Lawas nerima kangau madahka buding Sekula Primari Siang-Siang Lawas ampuh bah urung pukul 7.45 minit pagi.
“Seninjik datai raban emenjensi ba palan penusah beratika ai udah ngampuhka kandang sekula nya kira empat kaki penalam sereta dianggarka urung 56 iku nembiak ke bemalam ba buding tekeruga enggau tepekul sereta begunaka bantu bomba ngambika ulih pansut ngagai endur ke lebih likun,” ku iya.
Iya madah munyi nya maya dirandau TVS, pagi tadi.
Ku iya raban sida beguai mindahka tudah nembiak ke tepekul ngena sebuah bot bomba nuju palan ke lebih likun.
Udah nya raban sekula nganjung bala nembiak ngagai apai indai sida empu ngambika terus pulai ngagai rumah diri.
Udah nya ku iya tikas ai bah diperati majak surut. -TVS