KUCHING, 24 Mei: Semangat segulai sejalai dalam mayuh pupu bansa di Sarawak deka terus nyadi pugu ngagai pengelantang menua.
Kaban Kunsil Nengeri (ADUN) Murum Kennedy Chukpai Ugon madah pemanah enggau penyelai pemayuh budaya enda nagang semua komuniti terus idup begulai nyadi rayat Malaysia enggau Sarawak.
Ku iya, kunchi ngagai penyerakup tu bepanggai ngagai penemu bebaik , bebasa ke pangan diri ngambika komuniti terus idup lantang.
“Pengawa Segulai Sejalai dalam pupu bansa nyadi pugu ngagai pemujur rayat di Sarawak.
“Pengering penyerakup kitai kebendar bepanggai ngagai pemaik begulai, taja kitai ngembuan bida ke nyelai.
“Ari ulah bebasaka enggau meretika pangan diri, kitai ulih nempa sebuah komuniti ke tegap sereta lantang,” ku iya.
Iya mansutka jaku nya maya Pengerami Malam Main Asal Orang Ulu nyerumba Bazar Gawai Dayak di MJC Batu Kawa, malam tadi.
Chukpai mega bisi muji pengawa komuniti Orang Ulu ti terus chakah nyaga enggau ngetanka pesaka aki ini sida ngambika ulih diturunka ngagai rebak baru.
Pengawa nya ku iya, meri peluang ngagai mensia mayuh sama ngasaika pengaga sereta temegah ngembuan pengaya pesaka ke chukup manah ari komuniti nya.-TVS
