KUCHING, 23 Mei: Perintah Sarawak udah ngagihka belanja sepenyampau RM19.88 juta dikena ngemujurka Projek Palan Nimbun Ai di MJC Batu Kawa dikena ngurangka penanggul ampuh bah ba sitak nya.
Sapit Premier Sarawak Datuk Amar Dr Sim Kui Hian madah projek nya endang atur lengkas dikena mutarka penanggul ampuh bah ketegal ujan bangat ngujungka ai kelalu mayuh sereta lubah anyut ke Sungai Maong Kanan.
“Sekeda randau sereta pansik dipejalaika Opis Parit enggau Entali Ai Sarawak, Perintah Sarawak udah ngelala endur ti deka alai bejalaika projek nya dikena ngurangka penusah ampuh bah ba sitak nya,” ku iya.
Dr Sim ke mega ADUN Batu Kawa madah munyi nya pengudah ngemataka Pengawa Nyerah enggau Nerima Projek Palan Nimbun Ai Fasa Satu ngagai kunteriktor ke bekaul, ensana.
Ku iya, projek ke nelan ungkus sepenyampau RM19.88 juta nya berengkah 24 Mei 2024 nyentuk 23 Mei 2026.
Iya madah, Palan Nimbun Ai nya mungkur kandang endur urung 4.2 ikar, nengah penalam dua meter.
Projek tu dianugerahka nengah proses tinda tebuka, lalu M/S Wawasan Capital Limited udah mujur bulih tinda nya.
“Palan Nimbun Ai tu ngembuan dua iti guna. Kesatu, maya ujan bangat iya ulih nyimpan ai ari sistem entali ke semak.
“Udah ujan ngetu, ai ke disimpan nya tadi deka anyut belubah ngagai Sungai Maong Kanan lalu nya deka ngurangka penanggul ampuh bah.
“Kedua, maya musin kemarau nadai ujan nyadi palan tu ke nadai ai tu ulih digaga nyadi padang main bol mensia mayuh,” ku iya.
Dr Sim mega madah pangka besai deka nyadi bekau ari ubah klimet dunya enggau mesti digaga atur lengkas dikena mutar isu-isi ke ulih ngeruga pengidup rayat.
“Projek Palan Nimbun Ai nya diperati nyadi siti strategi dikena ngurangka penyadi ampuh bah.
“Opis Parit enggau Entali Ai Sarawak deka bejalaika projek ke sebaka ba sigi endur enda jauh ari MJC Batu Kawa,” ku iya.-TVS
