SARATOK, 23 Mei: Bisi 6,522 hentar Tanah Hak Adat Bumiputera (NCR) ba sitak Krian Tengah ditu udah disukat ngena Sekyen 6 Kanun Tanah Sarawak sebedau tu.
ADUN Krian Friday Belik madah, ari penyampau nya semina satu pertiga tauka 2, 478 hentar deka disukat ngena Seksyen 18 Kanun ke sama enda lama agi.
“Semua ke udah disukat ngena Seksyen 6 di Krian Tengah kira 6, 522 hektar lalu udah tu ila iya ke deka disukat ngena Sekyen 18 iya nya 2, 478 hektar.
“Reti nya semina satu pertiga ari penyampau semua tanah nya ke udah disukat ngena Seksyen 6.
“Nyadi tanah tu ngaul 20 buah rumah panjai enggau sebuah Genturung Pendoiau Melayu di sitak Sepuk.
“Semua ke deka disukat serak tu ila iya nya 1,059 lot disukat ngena Seksyen 18,” ku iya.
Friday nerangka pekara nya pengudah tembu Randau Nyukat Lot Tanah Siku-Siku ba sitak Krian Tengah enggau Kampung Sepuk diatur Opis Tanah enggau Survei (JTS) Betong bepalan ba Diwan Serbaguna Opis Pelilih Saratok ditu, ensana.
Ku tandu iya, arapka bala Tuai Rumah enggau Tuai Raban Bansa (KMKK) di Krian tengah ulih berandau tumu dalam ngatur garis antara adan enggau pangan diri dikenan nentuka pengawa nyukat nya ila bejalai enggau lanchar.
Sama bisi datai ADUN Kalaka Mohd Duri, Perambu Mengeri JTS Betong, Morris Nayup, Pengari Residen Betong Ramsay Selat, Pegawai Pelilih Saratok Mohd Dino Amid enggau ke bukai.-TVS
