DEBAK, 22 Mei: Pengawa ngatur Pesta Manggut tauka lebih dikelala enggau Pesta Buntal 2024 deka dikemanah agi sereta diperambu diatur ujung bulan Julai, ku Datuk Mohd Razi Sitam.
Kaban Kunsil Nengeri (ADUN) Saribas madah pekara nya beduduk ari pengerami nya udah nyadi ikonik ngagai raban ke rinduka ikan buntal ba selampur Sarawak sereta udah lama nadai diatur kenyau ari taun 2020.
“Sekumbang udah Covid-19 iya nya taun 2020,2021 nyentuk ke diatu lalu empai diatur Pesta Ikan Buntal Manggut.
“Ikan buntal tu antara ikan ke chukup nyelai bisi ba sepanjai Sungai Saribas nyadi pengerami tu nyangka deka diatur ba taun tu.
“Enti nadai penanggul diperambu diatur ujung bulan Julai taun tu,” ku iya.
Razi ke mega Sapit Menteri Pemansang Indu, Anak Mit enggau Komuniti madah munyi nya pengudah Program Sejambak Kasih Gawai Renggat Betong 2024 empai lama.
Ku terang iya, disadang urung 20, 000 iku temuai dikeandal datai ngerichahka pengerami Pesta Buntal ke deka diatur ba Tebing Sungai Saribas.
Pia mega ku iya, antara aktiviti ke ulih matak penatai temuai maya nya ila baka pekit lumba perau, pekit nyala ikan buntal tauka disebut komunikal lokal dia aktiviti nagang buntal.
Pesta Buntal deka diatur nengah kerejasama antara Palan Servis ADUN Saribas enggau Opis Residen Betong seraya disukung Opis Menteri Dagang Temuai enggau Main Asal Sarawak (MATCP). – TVS
