SARATOK, 22 Mei: Penanggul bah tunggal ke suah nyadi ba kandang Pasar Saratok sereta sekeda genturung pendiau Melayu ke besemak patut diputar enggau lengkas.
Kaban Kunsil Nengeri (ADUN) Kalaka Mohd Duri madah mayuh perambu dikena mutark penanggul nya ungkup timpuh pandak enggau panjai.
“Aku udah baum semua opis nyengkaum DID, JKR, Opis Pelilih enggau semua KMKK ngambika ngelala sereta ngiga chara pemadu jampat dikena mutarka penanggul nya.
“Nya alai, kami udah minta raban DID beratika semua perambu dikena mutarka penanggul bah tunggal ngambika nadai agi ngenusah peranak ke diau besemak,” ku iya.
Iya mansutka pekara nya pengudah baum ba Opis Pelilih Saratok, empai lama.
Nya alai, Mohd Duri madah iya andal raban Opis Parit enggau Entali Ai (JPS) Betong ulih berundingka perambu ke udah dibantai nengau aum nya awakka penanggul nya nadai agi nyadi dudi hari.
Nitihka penerang, penanggul bah tunggal ba Pasar Saratok sereta sitak ke besemak bepun ari sistem parit ke mit enggau enda diatur manah ngujungka penusah bah tunggal maya ujan bangat enggau musin landas.-TVS