SARATOK, 18 Mei: Achara nyumpit deka terus diangkat nyadi sebengkah main ikonik dikerinduka mensia mayuh di pelilih Saratok.
Kaban Kunsil Nengeri (ADUN) Krian Friday Belik madah, main nya deka dipasuk nyadi siti ari pekit diatur nyerumba Pesta Saratok bulan Oktober ila.
“Nyadi kitai ngarapka mayuh agi orang datai masuk pekit tu nyengkaum ari luar Saratok, Betong enggau mega selampur Sarawak.
“Kitai deka nguji ngangkatka main nyumpit tu ari segi pekit ngagai tikas ke lebih tinggi ukai semina dimain maya Gawai,” ku iya.
Iya mansutka penemu nya maya bejadika Pekit Nyumpit Tetutup diatur Gerempung Bansa Dayak Sarawak (SDNU) Pampang Saratok di Rumah Dayak Saratok, kemari.
Friday mega ngarapka main nyumpit ulih dipasuk dalam Pekit Lumba Malaysia (SUKMA) enggau pekit besai ke bukai ba renggau nasional dudi hari.
Nengah sukung ke chukup manah diterima ari mensia mayuh, iya andal main nyumpit ulih nyungkak industri seni ngaga sumpit ba sarawak seraya mantu nyungkak ekonomi pemekuh seni kraf jari ba menua pesisir.-TVS
