KUCHING, 10 Mei: Kort Bumiputera Sarawak napi pemar deka netapka timpuh mutarka sekeda kes kelikuh pasal pengawa ngempu Tanah Hak Adat Bumiputera (NCR) belabuh ari kes nya direjister nyentuk ba renggat kepenudi pemutus digaga.
Sapit Menteri ba Opis Premier Sarawak (Undang-Undang enggau Adat Bumiputera), Datuk Jefferson Jamit Unyat madahka, pemar nya nyadi enti ngaul kes apil ba Kort Bumiputera Residen enggau Kort Apil Bumiputera.
“Bisi pemar ke ditapi Kort Bumiputera Sarawak deka nerapka timpuh mutarka sekeda isu kelikuh ngaul Tanah Hak Adat Bumiputera (NCR) ari kes nya direjister nyentuk datai ba renggat kepenudi pemutus digaga.
“Nya alai, enti bisi apil ke Kort Bumiputera Residen tua ke Kort Apil Bumiputera nya laban tetiap kes bepanggai ba fakta enggau gaya diri empu sereta lawyer ke dichiri ari sekeda ejensi ke bekaul,” ku iya.
Iya mansutka jaku nya rambau nyaut tanya terus ari Kaban Kunsil Nengeri (ADUN) Bukit Semuja, John Ilus maya Aum DUN Sarawak, kemari.
Bepelasarka tusun atur Native Course Rules 1993, sesebengkah kes begunaka timpuh lebih enam bulan diputar enggau timpuh nya nyengkaum pengawa ngapil ti dibantaika ngaul kes nya.
“Nitihka seksyen 5(3) sesebengkah ordinan Kort Bumiputera Sarawak 1992 sesebengkah kes bekaul enggau isu kelikuh bekaul enggau hak ngempu tanah NCR deka berengkah dipechara nitihka pelilih ti bisi bidang kuasa ba kes nya.
“Udah nya, enti penuntut tauka defendan betalatka pemutus Kort Bumiputera pelilih nya, sida ulih ngaga apil ke Kort Bumiputera Residen dalam timpuh sebulan ari hari bulan pemutus nya digaga,” ku iya.-TVS
