KUCHING, 9 Mei: Rikod kusung kes angus dikearapka ulih dijapai ba serata Sarawak sepanjai musin pengerami Gawai ke deka datai.
Sapit Menteri Pengerai Mensia Mayuh, Pengawa Berumah enggau Perintah Lokal Sarawak Datuk Michael Tiang Ming Tee madah arapka pengerami Gawai tu ulih dirami baka pengerami Hari Raya ke udah iya nya nadai penusah angus nyadi ke ngaul bebadi nyawa.
Ku iya mensia mayuh mesti seruran ngemeratka isu pengelikun nyengkaum penusah angus sereta ngemeratka pengelikun diri sebilik lebih agi raban anak mit.
“Saya dipadahka maya pengerami Hari Raya Aidilfitri ke udah nadai insiden penusah angus ti ngujungka bebadi nyawa diripot enggau arapka baka nya baru maya pengerami Gawai tu deka datai.
“Aku andal nya nyadi laban penyedar mensia mayuh pasal pengelikun lebih agi pengelikun ari penusah angus ke chukup tinggi,” ku iya.
Michael Tiang madah munyi nya maya Pengerami Nanggam Kaul Aidilfitri, Mantar Gawai enggau Ngintu Hari Bomba Sedunya 2024 ditu, kemari.
Tandu iya Opis Bomba Enggau Penuah Penusah Malaysia (JBPM) Sarawak mega bejalaika pengawa enggau manah dalam ngatur program sereta kimpin ke ulih meri penyedar ngagai komuniti bekaul enggau isu tu.
Dalam rindang berami, pengawa bejejaga nadai putus dikereja dikena nentuka rikod kusung insiden angus ulih dijapai.-TVS