MUKAH, 4 April: Empat iku lelaki ditan sereta besereta barang ke dirampas dianggarka berega RM11 juta nengah sebengkah operasyen polis ke bepengkalan ba Jalai Feri Lama ditu, malam kemari.
Barang ke dirampas nya ngaul 22, 000 kartun ai bisa bemacham chap, sebuah kapal tungkang, dua buah luri treler enggau 10 buah treler.
Tuai Polis Pelilih Mukah, DSP Muhamad Rizal Alias madah, operasyen dipejalaika seraban polis ari Indu Opis Briged Sarawak Pasukan Gerakan Am (PGA) pengudah nerima penerang pasal pekara nya.
“Bela dirampas iya nya sebuah kapal tungkang, dua buah luri treler enggau 10 buah treler enggau penyampau dipegulai sekali dianggarka urung RM 11, 327, 200.
“Tu siti pemujur besai ungkup raban polis dalam nagang ulah salah baka tu di Sarawak lebih agi ba Mukah.
“Terima kasih ngagai semua ke bekaul enggau operasyen tu,” ku iya.
Bekau ari operasyen nya, tiga iku lelaki peranak asal menua tu empu enggau siku peranak luar beumur entara 43 ngagai 59 taun ditan laban puntan nunjuk ke permit ngundan barang ngagai raban kastam.
Ku iya, semua barang ke dirampas nya udah dibai ngagai Indu Opis Polis Pelilih Mukah sereta diserahka ngagai Begian Tasat Jenayah ambika pansik silik.
Kes ditasat nitihka Seksyen 135(1)(D) Akta Kastam 1967.-TVS
