DEBAK, 4 Mei : Fungsyen Palan Aktiviti Orang Tuai (PAWE) Debak sekumbang iya udah ditumbuh nyentuk ke diatu diperati chukup ngemegah.
Sapit Menteri Pemansang Indu, Anak Mit Enggau Pengelantang Komuniti Sarawak Datuk Mohd Razi Sitam madah, pekara nya nyata dipeda maya palan nya mujur bejalaika bemacham aktiviti ti meri pemaik ngagai kaban PAWE Debak.
“PAWE Debak chukup regas ngatur bemacham program ke pemaik raban orang lunggar umur.
“Tabi puji ngagai tim PAWE laban udah ngatur program ke baka tu,” ku iya.
Iya madah munyi nya maya bejaku ba Pengerami Bejadika Palan Aktviti Orang Lunggar Umur (PAWE) Debak, kemari.
Razi ke mega Kaban Kunsil Nengeri (ADUN) Saribas ngarapka komiti PAWE Debak terus regas ngatur sebarang aja aktiviti dikena ngisi jam lepa raban orang tuai di Debak.
Sama bisi datai ngulu pengerami tu Menteri Pemansang Orang Indu, Ruang Bilik enggau Komuniti Malaysia Dato Sri Nancy Shukri, Kaban Parlimen Betong Dr Richard Rapu enggau ke bukai.-TVS